|
Me het drüber gschwätzt,
überlegt und grätslet, doch keine het so richtig Mum und Muet bewiise.
Vor zwei drei Joor isch das gsi und Zyt het’s brucht bis im Oktober
1999, denn het me sich äntlig troffe im Mulbeeri nämlig am achti z’Obe.
7 FUNatischi Fasnächtler sin dört zäme koh und sin sich einig worde,
dass das e gueti Sach git.
Zwei Wuche spöter het me sich den au mit’em Instrumänt zur erschte
Prob troffe; an de Trompete dr Olivier Haldimann und dr Cello Marchand. An
de Posune dr Frère Pascal, dr Gysin Pascal und dr Grossen Markus (leider
nur als Hilf, är blibt de Schränz-Gritte treu). Am Schlag dr Burri
Patrick an dr Pauke und dr Gretler Jerry an dr Trummle.
Aber
was wämer spiile, dass isch die grossi Frog gsi?
Mit’eme Wanderer und em Fäärimaa isch’s den los gange und ändi Prob
hämmer no mit’em Have e Dream vo de ABBA aagfange, so hämmer in dr
zweite Prob mit’eme Repertoire vo sagehafte 3 Stückli könne los legge.
E paar Probe spöter isch denn dr Torzi Guido mit’em Sousaphon als
verstergigg zue uns gstosse (au är leider nur als Usshilf, är blibt dr
Negro treu). Doch kurz druff ab isch dr Zeugin Marco mit sim Sousaphon ko
luege und het gmeint: “ mir gfallts, do blibi “!
Wow!!
Jetzt foht’s ah gfalle, s’musikalische und dr FUN stöhn z’oberscht
uff dr Lischte.
Do
no ne paar d’Fasnacht 2000 bi andere Verein bestritte, sin au d’Gedanke
ärnschter worde: was isch nach dr
Fasnacht???...........................he, d’GV natürlig!!!
An däre GV bzw. Vereinsgeburt wo am 15. April 2000 stattgfunde het,
het me über d'Statute gschwätzt, e Vorstand gwählt und sunschtigi
Ämtli verteilt. Das isch zimmlig ribigslos über d’Bühni, wenn’s mit
dr Wahl vom Name verglichsch. Do hets Vorschläg gäh s’isch kum z’widerhole,
s’het Sache gäh wie; d’Aschmatiker oder die Verschiffte u.s.w. Aber
do mir jo FUNatisch musiziere und dr FUN wänn ha, het sich dr Name
FUNatiker fascht miese duuresetzte.
D’Frog het sich au wägem Probekäller gstellt und me het dr Willi, das
isch dr Beitzer vom Wisegarte z’Kleihünige, gfrogt wie das mit'em
spiile in sim Käller wurd ussgseh?? Är het denn gmeint, dass sigi kei
Problem mr dörfe gärn ko. An däre stell wott ich mi im Name vo de
FUNatiker bim Willi rächt härzlig bedanke.
Am 18. April 2000 isch denn au scho die erschti Prob gsi und mr hän trotz
zwai abmäldige elf Nase könne zelle. Leider sin denn die nägschte Probe
nümm e so guet bsuecht worde, worum isch uns Hüt no e Rätsel. Es isch
denn no sowit koh das gwüssi gar nüm eschiine sin. Nach däm „Stress“
und e paar wirglig guete Probe, hän mir uns entschiide trotzdäm witer z’mache
und an dr Fasnacht 2001 mitzmache.
Nach de erschte 2 Ufftritt, wo sehr guete ahklang gfunde hän, sin au die
letschte zwiefel gschwunde. Au hämmer neui Mitglieder dörfe begriesse,
so hän sich d'FUNatiker dra gmacht d'Fasnacht und dr Bummel 2001
z'organisiere.
Mit 11 FUNatiker und 10 Stückli hämmer den die Fasnacht 2001 in aagriff
gno und würglig 3 super schöni Dääg dörfe erläbe. Au dr Bummel isch
e hammer gsi bis und mit dr Freiestrooss.
Mit’em Abschied vom erschte Vereinsjoor an dr GV 2001, hämmer s’zweite
mit 4 neue Mitglieder am 21 April 2001 in aagriff gno, ganz nach’em
Motto:
dr Webpfuscher
|
